PINAGBABARIL ng mga pulis ang isang kilabot na drug pusher nang tangkain nitong pasabugin ang kanyang bitbit na granada para takasan ang paghuli sa kanya sa Zamboanga City kaninang umaga (Pebrero 25).

Nagtamo ng tama ng bala sa iba’t ibang parte ng katawan at namatay noon din ang suspect na si CJ Gardose Fernandez, 25-anyos, residente ng Barangay Talon-Talon.

Sa ulat, naganap ang malagim na insidente dakong 5:30 nitong Linggo ng hapon sa Barangay Talon-Talon sa Zamboanga City.

Ayon sa Zamboanga City police office (ZCPO) bago ang insidente ay nagkasa ng isang buy-bust operation ang PNP Anti-Illegal Drugs Special Operation Task Force (AIDSOFT) dahil sa hayagang pagbebenta ng droga sa lugar.

Nabitag sa operasyon si Fernandez matapos magpanggap na poseur buyer at iabot ang kanyang epektos sa isa nilang operatiba.

Pero bago naman nadakma ay naglabas ng granada si Fernandez at tinangka nitong pasabugin pero naunahang siya ng mga pulis na paputukan bago pa nito natanggal ang safety pin.

Narekober kay Fernandez ng ilang pakete ng hinihinalang shabu, mga drug paraphernalia at ang marked money na ginamit sa operasyon.

Naniniwala ang awtoridad na maliban sa mga pulis ay maraming madadamay na mga sibilyan kung hindi agad napatay ang suspect sa tangkang pagpapasabog sa granada nito.