ZAMBOANGA CITY – Kritikal ang driver ng isa sa mga truck na nagkakarga ng iron matapos paulanan ng bala ng mga armadong grupo sa highway ng Purok 4, Barangay Sinaguing, Ramon Magsaysay sa Zamboanga de Sur. 

 

Kinilala ang biktima na si Julito Nasaraga, 50, residente ng Barangay Tubo Pait, Dumalinao ng nasabing lalawigan. 

 

Sa report ng Magsaysay municipal police station, bandang alas-7:00 ng umaga habang naka-convoy at dumadaan sa lugar ang limang 10-wheeler dump truck nang harangin at pagbabarilin ng hindi pa nakilalang mga armadong suspek.

 

Galing umano ang nasabing mga truck sa bayan ng Midsalip ng naturang lalawigan at papunta sana sa Iligan City para mag-deliver ng mga dalang iron.

 

Natamaan din ng bala ang iba pang mga truck na kasama sa convoy at masuwerteng nakaligtas ang iba pang mga driver.

 

Narekober ng mga nagrespondeng pulis sa lugar ng insidente ang mga basyo ng bala ng carbine rifle, 9mm Lugger at iba pang mga matataas na kalibre ng baril.

 

Inaalam pa ng otoridad kung ano ang motibo sa pananambang at ang pagkakakilanlan ng armadong grupo na responsable sa pag-atake. (MRDS)