Injured	Killed
2	0

Date: 06 March 2013
Source: Bombo Radyo

ILOILO CITY – Ginapat-od pa sa subong sang mga pulis kun mistaken identity lang ukon target gid nga patyon sang ginapatihan mga guns for hire ang district supervisor sang Department of Education- Division of Iloilo sa banwa sang Pavia.

Sakay sa iya kotse ang biktima nga si Pasencia Jovero, 62-anyos sang Pagsangaan, Pavia, Iloilo kag padulong kuntani sa eskwelahan sang ginluthang sang riding in tandem sa Tigum, Pavia kaina sang aga.

Sa imbestigasyon sang mga pulis, ginpalukpan sang mga suspek ang salakyan sang biktima kag ginpilit nga buksan apang sang indi mabuksan ang pwertahan, sila ang ginluthang.

Naigu ang biktima sa iya likod kag ang 11 anyos nga hinablos sini sa tiil kag nagapabilin subong sa ospital.

Sa interview sang Bombo Radyo kay Police S/Insp. Dante Dumanguing, hepe sang Pavia Police Station, posible nga nasal-an lang ang biktima apang wala man ginadula ang posibilidad nga hold-up ang motibo bangud ginapahayag nga may dala nga daku nga kwarta ang biktima.

Antes natabu ang insidente, nasiplatan pa ang isa sa mga suspetsado nga nagapanilag sa balay sang biktima.