Injured	Killed
2	0

Date: 03 May 2013
Source: Pilipino Star Ngayon

MANILA, Philippines – Kritikal ngayon ang kondisyon ng isang binata habang may sugat sa kamay ang kaibigan nito makaraang pagtatagain ng samurai ng kanilang kapit­bahay sa Pasig City, kamakalawa ng gabi.

Luwa ang bituka at wakwak ang tiyan nang isinugod sa Rizal Medical Center (RMC) si Ronald Bobos, 22, habang may sugat naman sa kamay ang kaibigan nito na si Jesson Galando, 21, kapwa ng Brgy. Pinagbuhatan.

Naaresto naman ang dalawang suspek na nakilalang sina Sixto Dorado, 52, at Jing Hermosilla, 32, ng Phase 2, Ilugin St., Pasig City at narekober mula sa kanila ang 34 inches na samurai at isang itak na ginamit sa pag-atake sa mga bikitma.

Dakong alas-9:30 ng gabi nang maganap ang insidente sa Ilugin St., Brgy.Pinagbuhatan ng nasabing lungsod. Sinasabing may matagal nang alitan ang pamilya ni Bobos at Dorado dahil naipakulong umano ng biktima ang tiyuhin ng suspek.

Bago maganap ang insidente ay nagkakasayahan umanong nag-iinuman ang mga suspek sa lugar nang mayroon umanong nambato sa kanilang bahay.

Dahil dito, agad na kumuha ng samurai at itak ang mga suspek saka sinugod ang mga biktima at walang sabi-sabing pinagtataga.

Sa pagresponde ng awtoridad ay nadakip ang mga suspek.