Injured	Killed
0	1

Date: 03 June 2010
Source: http://www.abante.com.ph/issue/june0310/crimes02.htm

Batang Commando, tinodas

(Juliet de Loza)

 

Hindi na nadala ng isang 26-anyos na miyembro ng “commando gang” ang pagkaing binili para sa asawang buntis matapos barilin at saksakin ng hindi nakikila­lang mga suspek kahapon ng madaling araw sa Tondo.

Nagtamo ng isang bala sa likod at tama ng saksak sa iba’t ibang bahagi ng katawan si Berto Plana, taga-Gate 67, Area H, Parola Compound, Tondo.

Pinaghahanap naman ng pulisya ang mga suspek na nasa apat hanggang limang katao na mabilis na nagpulasan matapos makitang wala nang buhay ang biktima.

Sa imbestigasyon ni PO3 Jay Santos, ng Manila Police District – homicide section, alas-12:15 ng madaling araw nang maganap ang pag-atake kay Plana sa loob ng palengke sa Gate 17 Area H, Parola Compound, Tondo, Maynila.

Nalaman na habang bumibili ng pagkain ang biktima, nakitang hinabol ito ng mga suspek. Hindi na nakatakbo ang biktima nang tamaan ng bala sa likod at nang bumagsak ay pinagtulungan pang pagsasaksakin.

Nabigo naman ang pulisya na makakuha ng impormasyon hinggil sa posibleng motibo sa pagpaslang sa biktima.