ZAMBOANGA CITY – Pinasabugan ng grenade launcher at inulanan pa ng bala ng hindi nakikilalang armadong grupo ang bahay ng isang barangay kapitan kagabi sa Barangay Lower Sang-an, Pulacan, Labangan, Zamboanga del Sur.

 

Sa report na nakuha ng Bombo Radyo Zamboanga mula sa Police Regional Office (PRO-9), pagmamay-ari ang naturang bahay ng isang Haron Guiabar, ang barangay kapitan ng nasabing lugar.

 

Masuwerteng nakaligtas ang kapitan kasama ang pamilya nito at walang napaulat na nasugatan sa pangyayari.

 

Kaagad ding nakaresponde sa lugar ng insidente ang tropa ng Provincial Public Safety Company 3rd Platoon kasama ang kapulisan ng Labangan municipal police station subalit hindi na nila naabutan ang mga suspek.

 

Wasak ang ilang parte ng bubongan ng bahay dahil sa pagsabog at ang ilan pang parte ng bahay kung saan tumama ang mga bala.

 

Narekober ng mga otoridad sa lugar ang 36 basyo ng M16 rifle, 22 basyo ng M14 rifle at ang isang base part ng pinasabog na grenade launcher.

 

Patuoy ang isinasagawang imbestigasyon ngayon ng otoridad para matukoy ang mga responsable sa nangyaring strafing sa bahay ng kapitan ng lugar. (MRDS)