BAGUIO CITY – Manamnama a sumuko dagiti siyam a suspek iti panagmasaker kadagiti tallo a mannalon sadiay sitio Magabobong, Upper Maton, Pudtol, Apayao idi Hulyo 21, 2013.

 

Daytoy ti impakaammo a mismo dagiti kabagian dagiti suspek kadagiti otoridad gapu ta tarigagayda a maliklikan ti anyaman a panagibales manipud dagiti kabagian dagiti biktima.

 

Sigun met kenni Apayao Provincial Director Police Sr. Supt. Alverito Garcia , nangbukel ti PNP Apayao iti Provincial Investigation Task Force tapnu mapapartak ti panakarisut iti nasao a kaso.

 

Immunan a nabigbig dagiti biktima a da Felix Matulot, 75 anyos; Jason Acob, 29 anyos kenni Rogelio Rupad, 39 anyos bayat a dagiti suspek ket da Dionisio Bernal, Tubban Luban, Beltran Francisco, Divina Dandan, Gerald Daluguis, Marcelo Luban, Alex Luban, Bryan Bernal kenni Charlie Igwad a bin-ig a residente ti Kabugao, Apayao. 

 

Maipalagip nga adda ti saan a nagkinaawatan ti grupo dagiti suspek ken dagiti biktima seknan iti panagsurot iti lapat wenno panagiparit iti panagkalap a nangitunda iti nakaam-ames nga insidente.