Injured	Killed
0	9

Date: 31 March 2013
Source: Bombo Radyo

CAGAYAN DE ORO CITY – Hugot nga gihimakak karon sa militar nga moabot sa siyam sa ilang sakop ang nakalas sa dihang naka-engkuwentro nila ang grupo sa Front Committee 4-B sa rebelden New People’s Army kon NPA sa Barangay Bangbang, Medina sa Misamis Oriental.

Kini human eksklusibong gisugilon ni Jorge Madlos alyas Ka Oris nga nagsilbing tigpamaba sa Communist Party of the Philippines-New People’s Army-National Democratic Front (CPP-NPA-NDF) sa Bombo Radyo Cagayan de Oro nga upat ngadto lima ka higayon nilang giharas ang detachment sa 58th Infantry Battalion (IB) sa lalawigan nga giingong gikamatay sa walo ka sundalo ug gikaangol sa laing pito.

Sa paghinabi sa Bombo Radyo Cagayan de Oro kang 403rd IB spokesman Capt Ed Meclat nga propaganda lamang ang gisaysay ni Ka Oris.

Matud ni Meclat nga pagpakita lamang kini sa mga rebelde nga desperado na sa ilang walay tumong nga pakigbisog nga padayong miani sa negatibong reaksyon sa publiko.

Gihimo matud pa sa mga pildirong rebelde ang pahayag aron ma-demoralize ang kasundaluhan nga padayong migukod kanila sa tibuok nasud.

Hinoon, giangkon ni Meclat nga may usa ka army private ang namatay ug laing sibilyan ang naangol sa dihang nahitabo ang pila ka minutos nga engkuwentro sa maong lalawigan sa miaging semana.

Gisaysay usab niini nga napatay nila ang laing usa ka rebelde ug nailog ang M-14 armalite rifle sa dihang nahitabo ang engkuwentro didto sa Malaybalay City, Bukidnon.

Una nang gitug-an ni Ka Oris nga napatay sa ilang ginsakupan ang usa ka CAFGU member ug miangol sa tulo ka sundalo sa dihang nahitabo ang gubat didto sa Sitio Dugo-Dugo, Barangay Pelaez, Claveria ning lalawigan.

Samtang gipasalig usab ni Ka Oris nga dili sila mohimo sa pagpangatake sa gobierno sa tibuok Mindanao sulod sa Semana Santa.

Apan giklaro niini nga mohimo sila sa pagpangatake sa mga sundalo kon molusob kanila ang gobierno aron panalipdan ang ilang kaugalingon bisan ug mosampot pa kini sa ngilngig nga engkuwentro.

Hisayrang ugmang adlawa Marso 29 itamod na usab sa mga NPA ang ilang ika-44 ka tuig nga anibersaryong pakig-asdang rebolusynaryo batok sa nasudnong pangagamhanan.