GENERAL SANTOS CITY – Lima ang sugatan sa nangyaring hostage drama matapos magwala ang suspek kung saan biglang sinaksak nito ang kanyang ina, kapatid at dalawang pamangkin sa Sarangani province.

 

Kinilala ang suspek na si Joseph Pajarillo alias Otik na taga Purok 2, Poblacion Malapatan, Sarangani. 

 

Ayon kay PO2 Harold Alinsugay ng Malapatan PNP, tumagal ng tatlong oras ang negosasyon pero hindi nakinig ang suspek kaya napilitan ang mga pulis na barilin na si Otik na tinamaan sa paa.

 

Nanguna si S/Insp Razid Lingcob sa operasyon para mailigtas ang mga biktima matapos na pinagsasaksak.

 

Napag-alaman na ang ina ng suspek na si Natividad ay nasa kritikal ang kalagayan, habang sugatan din ang kanyang kapatid na si Selina na isang guro.

 

Ang limang mga biktima ay patuloy na ginagamot sa ospital sa lungsod.

 

Si Otik ay napag-alaman na may diperensya umano sa pag-iisip.