Injured	Killed
1	0

Date: 31 July 2013
Source: Bombo Radyo

(Update) BACOLOD CITY – Posible nga makasuhan man ang iloy sang 12-anyos nga biktima sang paghimulos sang retired US government employee sa ciudad sang Bacolod.

 

Base sa imbestigasyon ni Insp. Jovy Cabcaban, ang head sang Women and Children’s Protection Desk sang Bacolod City Police Office, nahisayran nga nasaksihan mismo sang iloy ang paghimulos sa iya anak sang live-in partner apang nagapamalibad nga magkooperar sa imbestigasyon kag sa baylo ginadampigan pa sini ang dumuluong.

 

Nahibaluan nga ang tiya sang bata nga utod man sang iya iloy amo ang nagreport sa insidente rason nga na rescue sang kapulisan kag Department of Social Welfare and Development ang biktima.

 

Ginklaro naman ni Insp. Cabacaban, nga ulihi na nga ginpalab-ot sa ila ang impormasyon rason nga wala naalerto ang Bureau of Immigration agod mapunggan ang pagguwa sang dumulong sa pungsod.

 

Base sa record sang Bureau of Immigration-Bacolod sadtong bulan pa sang Abril nakaguwa si Donald Scott Coleman samtang Hunyo 25, 2013 naman ginpaguwa ang warrant of arrest batok sa iya.

 

Si Coleman ang ginpangita sang Federal Bureau of Investigation bangod sa 2 counts of rape nga ginapangatubang sa US.

 

Una na nga ginpahayag ni BCPO Spokesman Supt. Armando Tubongbanua nga ginatun-an pa nila ang kaso batok sa iloy apang gina-una anay ang principal suspect nga si Coleman.

 

Nagatindog naman nga tagreklamo sa kaso amo ang amay sang bata nga madugay na nga nagbulag sa iya asawa.