Injured	Killed
6	4

Date: 28 January 2013
Source: http://www.sunstar.com.ph/superbalita-davao/balita/2013/01/23/4-patay-6-angol-sa-pinusilay-264341

TACURONG CITY — Upat na ang patay ug unom ang naangol sa nagpadayon nga katag-katag nga engkuwentro tali sa duha ka kumander sa Moro Islamic Liberation Front (MILF) nga nagsugod pa alas 2:40 sa hapon niadtong Lunes.

Gibutyag ni Sultan Kudarat Provincial Police Officer Director Rolen Balquin nga moabot na ngadto sa 204 ka pamilya ang mihiklin gikan sa Barangay Pinguiaman, Lambayong, utlanan sa munisipyo sa Sultan Sabarongis ug SK Pindatun, Maguindanao.

Ang pagbakwet nahitabo human nag-engkuwentro ang grupo ni Kumander Bansil sa 106th Base Command ug Kumander Bausad sa 105th Base Command sa MILF.

Suma ni Balquin nga giilugan nila Bansil ug Bausad ang lima ka ektaryang yuta nga maoy hinungdan sa away sa ilang matag pamilya.

Upat na ang patay ug duha ang naangol sa grupo ni Bansil samtang duha sa mga sakop ni Bausad ang nasamdan apil na ang duha ka sibilyan nga naigo sa mga saag nga bala.

Mga sibilyan nga pabilin karong nagpaalim sa Cotabato Regional and Medical Center (CRMC) sa siyudad sa Cotabato mao sila Abdulrasid Baman ug Nasrullah Mauba.

Ang grupo ni Kumander Bansil gikan sa SK Pindatun, Maguindanao misulong sa teritoryo ni Kumander Bausad sa Barangay, Pinguiaman, Lambayong.

Nagpadala na og special team ang MILF general staff aron resulbahon ang bikil sa magkaaway nilang mga field commanders.

Sa kasamtangan, gibantayan pag-ayo sa militar ang maong sitwasiyon aron maprotektahan ang mga sibilyan nga naapektuhan sa kagubot. (Edgardo Fuerzas)