Injured	Killed
0	0

Date: 20 March 2013
Source: Bombo Radyo

CAGAYAN DE ORO CITY – Naka-iskor na usab ang mga otoridad sa ilang kampaniya batok sa mga tulisan nga naglihok dinhi sa dakbayan.

Kini human ilang nasikop ang tulo ka suspetsadong tulisan diha sa Villa Ernesto, Gusa ning syudad kagabii.

Naila ang mga dinakpan nga sila si Jerry Cation, Charlito Linda Cati-on, ug Jimmy Manabay.

Nagbaklay sa dalan ang mga biktimang sila si John Mark Gomez ug Al Rose Blanquero sa dihang kalit lamang silang gitulis sa maong mga suspek nga sakay sa motorsiklo.

Nakuha sa mga tulisan gikan sa mga biktima ang ilang mahalong cellphone.

Apan gilayong nakaresponde ang mga barangay police sa Barangay Gusa, busa, ilang nasikop ang mga tulisan nga giingong pulos ubos sa impluwensiya sa makahubog nga ilimnon.

Nagtingkagol na karon sa prisohan ang maong mga suspek ug giandam na sa kapolisan ang kaso batok kanila.

Una niini, milampos usab ang mga operatiba sa Agora Police Station ubos ni Police Insp. Evan Binas sa pagsikop sa usa sa duha ka suspek sa pagtulis sa usa ka LBC-outlet diha sa Brgy. Gusa ning syudad sa miaging semana.