CAGAYAN DE ORO CITY – Nailhan na ang tulo ka mga lalaki nga naglakip sa duha ka minor de edad nga nakaplagan-patay diha sa Upper Carmen ning syudad sa miaging adlaw.

Ang maong mga biktima nailang sila si Jay Lozada, 16-anyos, usa ka Rocel, 21-anyos, ug Ivan August Agoncillo, 16-anyos nga pulos taga Davao City.

Mismo ang inahan ni Ivan Agoncillo nga si Anabelle Agoncillo, kinsa nahidangat sa syudad gikan sa Davao City kagahapon ang mi-ila sa maong mga biktima.

Diriyot pa makuyapi si Ginang Agoncillo sa dihang nakita niini ang patay’ng lawas sa iyang anak diha sa Bollozos funeral parlor.

Namahayag ang maong ginang nga nakatawag pa ang iyang anak ngadto kaniya sa miaging semana ug nangayog salapi aron ikapiyansa sa kasong ilang gi-atubang human sila nadakpan sa mga sakop sa Cogon Police Station tungod sa kasong kawat.

Sigon sa report ang maong mga biktima, ilado usab nga kawatan sa Davao City ug giingong mga miyembro sa Salisi Gang.