TATLONG holdaper  ang  napatay  makaraang  makipagbarilan sa  mga  pulis  matapos holdapin ang  isang  negosyante  sa  Quezon City  kaninang tanghali.

Ang  tatlong  suspek  na  hindi  pa nakikilala  ay  namatay noon  din  dahil sa  tama ng bala  ng baril sa  kanilang katawan.

Kinilala  naman ang biktima  na  si  James  Eliscas,  may-ari ng  Semento Pilipinas.

Ayon kay PO2  Virgilio Mabuloc  ng  Quezon City Police District  Tactical  Operation  Center  (TOC), naganap  ang insidente sa  kahabaan  ng Regalado  Avenue  at  Mindanao  Avenue,   Brgy.  Greater  Lagro, Fairview,  alas-12:14 ng tanghali  kanina.

Hinoldap  umano  ng  mga  suspek  ang  biktima  sa naturang  lugar.

Nagkataon  naman  nagpapatrulya  ang mga  tauhan ng  Quezon City Police District sa lugar at agad nakahingi ng  saklolo ang  biktima.

Subalit sa halip  na sumuko  ang  mga suspek  ay  nanlaban  ang mga ito sa mga pulis dahilan  para gumanti ng putok  ang mga pulis at masawi ang mga ito.

Nagsasagawa  na ng  follow-up  operation ang mga awtoridad  para makilala  ang mga nasawing suspek.