Luhaang dumulog sa himpilan ng pulisya ang isang ginang habang karga-karga nito ang anak na paslit na duguan ang short pants makaraang halayin umano ng kanilang kapitbahay sa Bgy. Zapote 1, Bacoor City, Cavite kahapon ng madaling-araw.

Base sa salaysay ng ina, lumabas siya ng bahay para bumili ng gatas para sa tatlong taong gulang na anak pasado ala-una ng madaling-araw dahil wala rin umano ang kanyang mister.

Pag-uwi ng bahay ay nasalubong umano niya ang suspek na kilala sa alyas na Intong, 21, habang papalabas ng kanilang bakuran.

“Nakasalubong ko po s’ya tapos pagpasok ko sa amin nakita ko ‘yung anak ko may dugo sa short at lambot na lambot,” salaysay ng ina sa panayam ng Abante TONITE sa istasyon ng Bacoor City Police.

Agad umano niyang tinawag ang mga tanod sa kanilang lugar kung kaya’t nadakma ang suspek na pansamantalang nagtago sa bahay ng tiyahin nito sa Aniban, Bacoor na may ilang metro lamang ang layo mula sa bahay ng biktima.

Todo tanggi ang suspek na nakatakdang iharap sa piskalya ngayong araw na ito, at paulit-ulit na sinasabing “hindi po ako kuya, hindi po ako”.

Samantala, nasa maselang kalagayan naman ang batang biktima na agad ring isinugod ng mga magulang sa Philippine General Hospital.