Injured	Killed
3	0

Date: 28 April 2013
Source: Bombo Radyo

LA UNION – Dua a barangay tanod ken maysa a mannalon iti nasugatan iti nagsina nga insidente ti pammaltog ditoy probinsiya a La Union.

Iti umuna nga insidente ket napasamak iti maysa a kasaran idiay Barangay Talipogo, Balaoan, La Union bayat a nakabantay ditoy iti tallo a barangay tanod.

Maipagarop a kellaat a timpuar iti saan a panagkikinna-awatan iti baetan dagiti biktima nga isuda Timoteo Ybay, 57, chief tanod ken Gerardo Madiam, 51, barangay tanod ken iti suspek a ni Jovencio Ortiz, 44, maysa met laeng a barangay tanod a makagapo iti nasao a pammaltog.

Nagsagaba ti sugat iti bagi dagiti dua ken madama a maag-agasan iti maysa a pribado nga ospital bayat nga an-anopen dagiti otoridad iti naglibas a suspek.

Narekober iti nakapasamakan ti krimen iti uppat nga empty shells ti cal. 45 pistol.

Kabayatanna, pinaltugan met laeng ti barangay tanod iti maysa a mannalon idiay San Gregorio, Caba, La Union.

Maibasar iti report, naginom iti biktima a ni Joel Abenojar, 45, ken iti suspek a ni George Bacungan, 54, kadwa da iti maysa nga Ernesto Latore idi maipagarop a timpuar iti saan a panagkikinna-awatan dagiti tallo agingga a nagresulta iti pammaltog ti suspek.

Nagsagaba ti biktima ti tallo a tama ti paltog iti akin-kannigid a luppo na.

Agtultuloy a maag-agasan ni Abenojar iti Ilocos Training and Regional Medical Center (ITRMC) ditoy syudad ti San Fernando.

Kabayatanna, maysa nga improvised shotgun wenno “sumpak” iti inaramat ti suspek.