Injured	Killed
0	2

Date: 13 April 2013
Source: Bombo Radyo

CAGAYAN DE ORO CITY – Duha ka gitoohang police characters ang gipamusil-patay diha sa Westbound terminal nga haduol sa Barangay Bayabas ning syudad kagabii. 

Naila ang mga biktima nga sila si Rizaldo dela Pena alyas Dodong, 40-anyos, minyo nga taga Manuel Vega St., Consolacion ug Gerry Carasco alyas Buddy nga taga Barangay 24 ning dakbayan.

Sigon sa report, naghantak sa maong dapit ang mga biktima sa dihang gipusil kini sa unom ka suspek nga sakay sa tulo ka motorsiklo gamit ang 45 kalibreng armas.

Nakaangkon si Carasco ug 18 ka samad pinusilan sa iyang ulo, likod, dughan, kamot, bukton ug sampot samtang si dela Pena ang nakaangkon usab ug samad sa iyang dughan ug abaga nga nagresulta sa ilang kamatayon.

Apan tulo lamang ka empty shells sa 45 caliber nga armas ang nakuha sa kapolisan gikan sa crime scene.

Hinoon, may mga pagtoong personal grudge ang motibo sa pagpatay sa mga biktima ug may mga pagduda usab nga hinimoan kini sa grupong vigilantes.

Matud ni PO3 Leonilo Lacyo sa Carmen Police Station nga ilang nasutang nalambigit sa ginadiling druga ang biktimang si dela Pena.

Hisayrang niadtong miaging adlaw, duha ka gitoohang police character gihapon ang gipangpusil patay sa wala mailang mga armadong kalalakihan.