| Injured | Killed |
|---|---|
| 0 | 0 |
Date: 25 May 2013
Source: Bombo Radyo
KORONADAL CITY – Nagapabilin gihapon sa evacuation centers sa Barangay Poblacion, Nuru Upi kag Barangay Burungutan, Upi, Maguindanao ang masobra 200 ka pamilya nga naipit sa pagkambyuhanay sang lupok sang duha ka grupo sang Moro National Liberation Front ukon MNLF.
Suno kay Upi Maguindanao Mayor Ramon Piang, gikan sa Barangay Ganasi kag Lamod ang mga evacuees.
Sa subong, napanagtag na ang bulig sa mga ini gikan sa LGU sang Upi kag ginalauman nga magaabot naman ang bulig gikan sa Maguindanao kag ARMM government.
Madumduman nga una nga nag-ibwal ang tensyon sa Upi, matapos ang pagpang-ambush kay Upi vice mayor Baba Omar antes ang midterm elections.
Suno sa inbestigasyon, gindis-armahan sang pila ka mga tinawo ni Omar ang duha ka katapu sang grupo ni Mama Binangon kag didto nagsugod ang tensyon sa tunga sang duha ka grupo.
Samtang, nagpirma na sa isa ka kasugtanan ang grupo nanday Baba Omar kag Mama Binangon.
Sa pagpakig-angut sang Philippine Marines, militar kag LGU, naghilisugot ang duha ka grupo nga untaton na ang away.
Nagalaum man si Mayor Piang nga matuman sang maayo ang nasambit nga kasugtanan.