Injured	Killed
0	0

Date: 03 May 2013
Source: Bombo Radyo

ZAMBOANGA CITY- Dalawa na namang katao ang napaulat na dinukot ng armadong grupo na hinihinalang miyembro ng bandidong Abu Sayyaf Group (ASG) alas-9:00 ng umaga kanina sa Baunoh Butong, Kilometer 5, Barangay Latih, Patikul Sulu.

Batay sa ulat ng Patikul PNP, kinilala ang dalawang biktima na sina Awan Usman, 30 at ang isang Boy Nunung, 32.

Napag-alaman ng pulisya na isa sa mga biktima ay driver ng mixer truck ng isang construction company na pinamumunuan ng isang Eng. Tabanlang.

Hinarang umano ng walong armadong kalalakihan na nakamaskara ang mga biktima at pwersahang tinangay.

Patuloy ang pursuit operation ng magkasanib na puwersa ng PNP at militar kaugnay ng insidente.

Inaalam na rin ng otoridad kung ano ang motibo sa pagdukot sa mga biktima.

Ito na ang pangalawang insidente ng pagdukot na nangyari sa lalawigan ng Sulu sa taong kasalukuyan.

Maaalala na noong nakaraang buwan, dinukot din ng armadong grupo ang isang negosyante. (MRD)