| Injured | Killed |
|---|---|
| 0 | 3 |
Date: 16 March 2013
Source: Sun Star Superbalita
Usa naigo sa pagpangrakrak sa balay; laing biktima gikan sa party
DUHA ka mga biyuda ang nangamatay sa managlahing mga pagpamusil sa miaging adlaw sa lalawigan sa Sugbo, usa kanila naigo dihang ang ilang balay girakrakan.
Namatay sa usa ka samad sa ulo ang 90-anyos nga si Paustina Riane, human girakrakan ang ilang balay sa wa mailhing tawo samtang sila nangatulog niadtong Huwebes sa kadlawon sa Sitio Gingkaote, Barangay Kapitan Claudio, dakbayan sa Toledo.
Si PO1 Emmanuel Aragon, desk officer sa Toledo Police nga nahinabi sa Sun.Star Superbalita, nagkanayon nga ang anak sa biktima nga si Bonifacio nibutyag nga nahinanok na sila sa pagkatulog. Nakamata sila sa mga buto-buto sa armas de fuego. Sa ilang pagsusi kon duna bay naigo kanila, ilang napalgan ang ilang inahan nga samdan sa ulo ug patay na.
Wa pa masuta sa kapulisan kon unsay motibo sa krimen.
Sa laing hitabo, namatay sa daghang mga samad pinusilan sa lawas si Rebeca Heroela, 58, biyuda apan dunay bag-ong gikapuyo.
Padung na siya mosulod sa iyang balay sa Sitio Waswasan, Barangay Gaas, Balamban, Sugbo dihang siya gipusil sa makadaghang mga higayon.
Si SPO1 Rolando Navarro sa Balamban Police nga nahinabi sa Sun.Star Superbalita, nagkanayon nga igo lang nakaabot sa pultahan ang biktima dihang nahagba.
Ang biktima uban sa iyang bag-ong kapuyo nga gikan nitambong sa birthday party sa iyang anak pipila lang ka metros ang gilay-on gikan sa ilang gipuy-an.
Sa ilang pagpauli, ang kapuyo nihapit sa pag-ayo sa linya sa tubig nga naputol samtang ang biktima nidiretso sa ilang balay.
Nakurat ang iyang kapuyo ingon mga anak human ilang nadunggan ang mga buto-buto sa armas.
Sa pagsusi, ilang nakita ang ilang inahan nga naligo sa dugo.
Gidali nila sa pagdala sa Balamban District Hospital ang biktima apan gideklarar nga dead-on-arrival (DOA).
Samtang usa ka giingong drug pusher gipusil patay sa mga tawo nga nagsakay og motorsiklo sa miaging hapon sa Sitio Tubod, Barangay Matab-ang dakbayan sa Toledo.
Si Simplicio Nengasca Jr., 25, ulitawo, naa sa wathhlist sa kapulisan sa dakbayan sa Toledo namatay human natusaktusak sa mga bala ang nagkadaiyang parte sa lawas.