Giila ang mga suspek nga sila si Noe Lalisan Jr. ug Emmanuel Bacarro nga pulos lumad nga taga Naawan Misamis Oriental samtang pabilin pang gawasnon si Michael Roxas diin padayon pang giimbestigahan sa kapulisan. 

 

Giila usab ang mga namatay’ng biktima nga sila si Jessel Layugi, 9-anyos ug Kathleen Layugi, 5-anyos, residente sa nasampit nga lugar. 

 

Matud sa inahan sa mga bata nga si Kristy Layugi, nga igo lamang nananghid ang iyang anak nga si Jessel nga maligo og ulan kuyog sa iyang manghod nga si Kathleen apan miabot na lamang ang hapon, wala pa makauli ang mga bata.

 

Giangkon usab sa inahan nga kumpiyansa kaayo siya sa iyang mga anak hinungdan nga wala niya kini bantaye tungod kay dili man mga talaag ug mahilig moadto sa mga lagyong lugar. 

 

Gibutyag ni Mrs. Layugi nga sa panahon nga gisusi sa mga personahe sa Scene of the Crimes Operatives kon SOCO ang patay’ng lawas sa iyang mga anak kinsa anaa na sa state of decomposition sa dihang ilang nakaplagan, nawala na matud pa ang mga laman-loob sa iyang mga anak. 

 

Nagtoo usab ang maong ginang nga gilugos ang iyang 9-anyos nga anak ayha gipatay sa mga suspetsado.