DUHA ka mga tawo ang gipusil patay atubangan sa ilang pamilya sa managlahing lugar ug hinungdan dinhi sa siyudad sa Davao niadtong Biyernes.

Ang usa gipatay sa wala mailhing armadong tawo samtang ang usa gipatay sa mga rebeldeng New People’s Army (NPA).

Gipatay samtang kauban iyang live-in partner sa alas 7:00 sa gabii mao si Christian Jude Hornido, alyas Duds, 21, nagpuyo sa Jasmin Alley, San Pedro Extension.

Sa imbestigasyon ni PO2 Danilo Alngog sa San Pedro Police Station, si Hornido gipusil sa wala mailhingmamumuno dihang mosakay na unta sa STC Taxi (plate number LXA-153) kauban iyang live-in partner  si Kristina Aquino.

Matud ni Alngog nga nakadagan pa ang biktima sa unang pagpusil kaniya apan gigukod siya sa mamumuno mao nga gipusil siya sa makadaghan nga gihayon.

Human sa pagpamusil, suma sa mga nakasaksi, ang mamuno daling mibiya sa maong lugar samtang ang biktima daling gidala didto sa Brokenshire Hospital.

Si Hornido gideklara ni Dr. Julius Cada nga patay na dihang miabot sa tambalanan tungod sa iyang usa ka samad sa tuong dalunggan, tulo sa likod ug usa sa tuong batiis.

Mga sakop sa Scene of the Crime Operative (Soco) nakahipus og tulo ka mga basiyo sa .45 kalibre nga pistola nga maoy gigamit sa mamumuno.

Gisusi na karon sa kapulisan ang motibo sa maong hitabo aron mailhan ang mamumuno, masikop ug pasakaan og kaso ngadto sa korte.

Samtang gipusil sab sa alas 2:00 sa hapon atubangan sa iyang asawa ug mga anak mao si Oligario Manday-onan, 48, nagpuyo sa Sitio Pamantawan, Kilometro 24, Barangay Malabog, distrito sa Paquibato.

Si Manday-onan nakaangkon og daghang samad pinusilan sa iyang kalawasan dihang gipusil gamit ang 9mm caliber pistol sa mga sakop sa Pulang Bagani Command (PBC) 1 nga gipangulohan ni Leoncio Pitao, alyas Kumander Parago.

Mga imbestigador sa Paquibato Police Station nagsulti nga gipatay ang biktima sa mga rebelde sanglit gikonsidera siya nga kaaway niini isip sakop sa Citizen Armed Forces Geographical Unit (Cafgu) sa 72nd Infantry Battalion nga nagkabase sa Malabog Detachment sa Philippine Army.

Ang biktima atua karon gihaya sa Rivera Funeral Homes samtang ang militar padayong naglutos sa mga sakop ni Kumander Parago.

Gipatik sa mantalaang SuperBalita Davao Mayo 30, 2010.