Injured	Killed
0	2

Date: 03 April 2013
Source: Bombo Radyo

ILOILO CITY – Sa tunga sang pagdumdum sang Byernes Santo sang nagligad nga Biyernes, duha naman ang ginbawian sang kabuhi sa shooting incident nga nagluntad sa Zone 1, Brgy. Cubay, Jaro, Iloilo City.

Sunu kay PO1 Raul Romero sang Jaro Police Station, natabu ang insidente sang Biyernes Santo sang gab-i.

Naga-inum-inum ang mga biktima nga sanday Renato Cayanan y Arescate, 30-anyos kag Alberto Lazarte y Kapatid, 48 anyos sa namatyan sa nasambit nga lugar sang hinali lang ginluthang sang tatlo ka mga suspetsado nga sakay sa motorsiklo.

Suno sa pulis, gintuad sang mga nakakita nga lunsay naka-bonnet ang mga suspetsado nga gilayon nagpalagyo matapos ang ginhimu nga krimen.

Si Cayanan ang nag-angkon sang multiple gun shot wound samtang igu naman sa wala nga dughan ang naangkon sang isa pa ka biktima nga si Lazarte.

Ang duha lunsay gindala sa West Visayas State University Medical Center kag pareho nga ginbawian sang kabuhi pasado alas-11:00 sang gab-i sang Biyernes Santo.

Sunu sa pulis, dumot ang ginasundan nga motibo sa insidente sa diin ang napatay nga si Lazarte ang anay involve sa Catamin Murder Case sang tuig 2008 kag sini lang nga bulan nakagwa sa prisuhan.

Ang biktima naman nga si Cayanan ang utod naman sang ginatudlo suspetsado sa isa ka shooting incident nga natabu sa Cubay, Jaro.