KORONADAL CITY – Nahuli ng mga otoridad sa checkpoint sa Barangay Saravia nitong siyudad ang dalawang suspek sa pagpatay at pagnanakaw ng motorsiklo mula sa isang indibidwal na taga-General Santos City.

Ayon kay P/Insp. Herlo Palmes ng 3rd Maneuver Platoon PPSC, sa koordinasyon ng Gensan PNP papuntang South Cotabato PNP, naaresto sina Arnel Bantayao Macalawan ng Brgy. Sampao, Maguindanao at ang triggerman na si Saiden Angas Gaya ng Ampatuan, Maguindanao sa checkpoint ng nasabing barangay matapos na nakailag sila sa limang checkpoint mula sa General Santos City.

Napag-alamang may dala-dalang kalibre .45 baril at apat na live ammunitions si Gaya.

May mga mantsa pa ng dugo ng biktima ang ginamit na escape vehicle papunta sa lungsod ng Koronadal.

Napag-alaman ding na bago ang kanilang pagkakadakip, nakapatay sila ng walong katao na sinasabing mga biktima ng carnapping.