DOS anyos nga batang lalake napusilan dihang nagpinusilay ang duha ka mga traysikol drayber gumikan sa pag-inilogay og pasahero niadtong Martes sa buntag.Ang duha ka mga suspek nailhan na sa dihang giila sa laing kaubang traysikol drayber nga nakasaksi sa maong hitabo.

Nahitabo kini taliwa sa pagpatuman sa Commission on Elections (Comelec) gun ban samtang nag-angat ang eleksyon sa Mayo.

Samaran sa iyang tuo nga bukton ang biktima nga si Christian Cambaya, taga-sityo Seaweed, Barangay Pusok, Lapu-Lapu City.

Saysay ni P/Insp. Zenaido Pastorfide nga sa miaging adlaw, ang mga suspek nga sila si Jeffrey Daitol, 25, tricycle driver, taga-Pasadse, Barangay Pajo ug laing tricycle driver nga si Christopher Ngujo, nagpinusilay gumikan sa panag-ilog sa pasahero.

Ang biktima nga kuyog sa iyang apohan nga si Eufemia Avila nagpamidpid sa karsada sa San Miguel, Pusok aron unta sa pagpalit og pagkaon niadtong Martes sa alas 10:30 sa buntag.

Bisan nga layo ra ang maong bata, naigo siya sa saag nga bala hinungdan nga nasamdan sa bukton.

Dali nga gidala ang bata sa iyang apohan ngadto sa tambalanan.

Samtang ang usa ka saksi nga nagdumili sa pagpaila maoy positibo nga nihingalan kang Ngujo.Matod pa ni Pastorfide nga padayon nilang gisubay ang nahimutangan sa maong mga suspek ug gikatakda nga pasakaan og kasong frustrated homicide.