KALIBO, Aklan – Arestado sa sangka entrapment operation ro sangka heavy equipment operator nga naghimueos sa 15-anyos nga textmate sa sangka motel sa Kalibo, Aklan.

Kasong rape in relation to RA 7610 ro ginapangatubang it suspek nga si Gerald Banquillo, 39, residente it Passi City, apang temporaryong naga-istar sa Numancia, Aklan.

Sa panaysayon it biktimang gintago sa pangaean nga “May”, ko nagtaliwan nga dag-on kat gin-text imao it suspek agud nga imbitahan nga makipagkita ag magpamasyar. Apang, owa sigon kara gin-eauman nga pagadaehon imao sa sangka motel ag ginhimuslan.

Ginpahayag pa it biktima nga bangud sa sobrang kahadlok hay owa eon imao it nahimo kat puwersahan nga himuslan.

Ko Hunyo 8, 2013 hay oman sigon nga nakipag-angot kana ro ka-textmate agud nga makipagkita.

Bangud kara, nagpangayo it bulig ro biktima sa pulisya ag nagpatigayon it entrapment operation sa andang ginakitaan.

Naaresto ro suspek ag insigidang ginpasakaan it nasambit nga kaso.

Nakakulong eon makaron si Banquillo sa Aklan Rehabilitation Center (ARC).