Injured	Killed
0	1

Date: 21 June 2013
Source: Banat

CEBU, Philippines – Usa ka 45-anyos nga amahan ang gipasakaan og kasong Child Abuse kagahapon human gipasanginlang mikulata ug miunay pagpatay sa iyang 13-anyos nga anak niadtong adlaw’ng Biyernes,  Hunyo 7, 2013 diha sa barangay Camp 4, dakbayan sa Talisay.

Ang maong amahan (pangalan gipugngan sa Banat News), residente sa maong dapit gisikop sa mga polis niadtong Miyerkules sa hapon human ang kapuyo niining 38-anyos misumbong nga gipatay niini ang ikaduha nilang anak.

Ang biktima ikaduha sa pito nila ka mga anak kinsa hangtud kagahapon ang patay’ng lawas niini wala pa makit-i.

Si Superintendent Elmer Lim, officer-in-charge sa Talisay City Police Station mipadala sa grupo ni Senior Inspector Allan Cuizon sa pagpahigayon sa search and retrieval operation sa patay’ng lawas sa bata diha sa kalibonan sa Camp 4.

Apan human sa tulo ka oras nga pagkawot sa yuta wala makit-i ang patay’ng lawas sa bata.

Ang kapitan sa barangay nga si Luciano Cabingatan Jr., uban sa mga tanod ug residente sa lugar mitabang usab og pangita sa patay’ng lawas sa biktima.

Ang duha ka mga anak sa suspetsado nga nagpanuigon og 11 ug 9-anyos mibutyag sa mga polis nga milili sila diha sa lungag sa bongbong sa ilang balay ug  nakita nila ang ilang amahan nga midagmal ug midunggab sa ilang maguwang.Giingong miuli ang suspetsado nga hubog ug nabati sa duha ka mga bata nga nagyawyaw kini nga patyon niya ang iyang anak nga lalaki.

Ang mga bata misulti sa ilang maguwang nga padaganon kay patyon kini sa ilang amahan apan mitubag kining dili siya modagan tungod kay maghuwat siyang moabot ilang inahan kay mokaon pa siya og pan.

Ang amahan sa biktima giingong mikuha og kutsilyo ug nakita sa duha ka mga bata kung giunsa sa pagdagmal ug pagdunggab patay sa ilang amahan ang ilang maguwang.

Giingong human mapatay sa suspetsado ang iyang anak giputos kini og panapton dayon gisulod og sako ug gidala ngadto sa ibabaw’ng bahin.

Matud sa inahan sa mga bata nga niadtong higayona didto siya sa Tabunok naninda og saging uban sa 6-anyos nga anak nila.

Ang ginang mibutyag sa mga tigbalita nga wala dayon mosulti ang iyang duha ka mga anak tungod kay gihulga kini sa amahan nga pamutlan silang tanan sa ulo ug pagkahuman ilubong sila ngadto sa ilang ulingan.

Mokabat sa 200 metros ang gilay-on sa balay sa suspetsado gikan sa karsada apan tungason na kaayo kini ug walay silingan sa duol.Ang mga polis nakakita og mga pat-ak sa dugo 15-metros gikan sa ibabaw nga bahin sa balay sa pamilya.Ang mga bato nga dunay pat-ak sa dugo gipadala pa kini sa PNP Crime Laboratory pagpiho kung dugo ba kadto sa tawo.

Ang kapikas niini mibutyag nga maoy kung mahubog ang amahan sa iyang mga anak ug dihay higayon nga gitionan siya niini og sundang ug hingulata usab kini. Gikontrahan niya ang anak kay giingong tapulan ug magsige lang og laag.

Ang suspek kusganong mihimakak sa pasangil sa duha niya ka mga anak apan miangkon siyang dunay panahon nga madapatan niya ang na-missing nga anak. (Brenda D. Batuto/EIM) (BANAT NEWS)