Injured	Killed
0	0

Date: 05 July 2013
Source: Bombo Radyo

NAGA CITY-Nakatalaan na tawan nin espesyal na pagbisto kan lokal na gobyerno kan siudad nin Naga an sarong aki matapos madakop an saro sa mga miyembro kan riding in trio.

 

Sa Facebook account kan siyudad nin Naga, nabisto an 12-anyos na aking si Janelle Guevarra.

 

Sa intribista man kan Bombo Radyo Naga ki City Information Officer Allen Reondanga, sinabi kaini na sa maabot na Lunes tatawan ninda nin certificate of commendation asin cash reward an aki sa ipigpahiling kaining kusog nin boot.

 

Enot digdi, naglalakaw suboot sa centro kan siudad an aki mantang nagtitext nin bigla na lang na agawon kan saro sa tulong mga suspetsado an saiyang cellphone.

 

Matapos kaini, nagibo pasuboot kan suspetsado na ngiritan an biktima dalan tangani urog ining maanggot kun kaya mayong pagduwa-duwang nilapag an naghaharurot na motorsiklo kan mga suspetsado.

 

Nakaputan suboot kaini an jacket kan suspetsado na nakaangkas sa hurihan na parte kan motorsiklo na iyo niyang pighila dalan tangani na mahulog an saro sa mga suspetsado.

 

Dae aram kan mga suspetsado, matibay palan sa martial arts an biktima na magpaibabaw pa suboot digdi tangani na pugulan na makadulag.

 

Tulos man na tinabangan kan mga nakahiling sa pangyayari an aki asin nadara sa hepatura kan pulisya an suspetsado na ngonian nakakulong na.

 

Segun sa lokal na gobyerno kan Naga, nadadapat lang na tawan nin onra asin pagbisto an aki huli sa bakong ordinaryong kaisugan kaini.

 

Pigsierto man kan city government an pagtatau nin proteksyon sa nasabing aki.