Injured	Killed
1	1

Date: 25 April 2013
Source: Bombo Radyo

CAGAYAN DE ORO CITY – Usa na ka giingong sakop sa rebeldeng New People’s Army kon NPA ang namatay ug laing usa ka sundalo ang samaron sa nahitabong engkuwentro sa Gingoog City, Misamis Oriental.

Sa paghinabi sa Bombo Radyo Cagayan de Oro, gisaysay ni 4th ID spokesman Maj Leo Bongosia nga nahitabo ang engkuwentro pipila ka metro lamang ang ginlay-on sa lugar diin unang nahitabo ang pagbanhig sa convoy ni City Mayor Ruthie de Lara Guingona nga gikaangol niini ug gikamatay sa laing duha ka civilian escorts nga si Bartolome Velasco ug Nestor Velasco.

Gibutyag ni Velasco nga giila ang samaron nilang sundalo nga si Cpl. Arnold Umaoeng nga kasamtangang gidapatan na sa medikasyon.

Samtang ang giingong rebelde nga namatay usa ka lalaki nga matud pa anaa na sa kustodiya sa pamilya niini sa lungsod sa Lagongong ning lalawigan.

Matud ni Bongosia nga mosamot nga ila nang ma-corner ang mga pasibat nga mga rebelde sanglit nahidangat na sa lugar ang tropa sa Philippine Marines Corps Marine Battalion Landing Team- 3 (MBLT-3) nga gipanguluhan ni Maj. Elpidio Factor nga motabang paglutos kanila.

Gialerto usab nila ang tanang unit sa militar ug mga pulis aron gilayong masumpo ang bisan nga diversionary tactics nga himoon sa mga rebelde sa ubang lungsod sa Misamis Oriental ug Bukidnon.

Dumduman nga labihan ang kapungot ni Pangulong Benigno Aquino sa pagbanhig sa mga rebelde kang Guingona hinungdang gipadad-an dugang tropa ang Gingoog City nga ubos na usab sa area of immediate concern sa Commission on Elections (Comelec).

Hisayrang hugot nga gikondenar sa pamilyan ni Guingona ang gihimong pagsulay ug patay kaniya sa mga rebelde ug gibasura ang pagtakuban nga pagpangayo’g pasaylo sa nahisgutang hitabo.