Injured	Killed
3	1

Date: 05 March 2013
Source: Bombo Radyo

ILOILO CITY – Isa ang patay kag tatlo ang pilason sa natabu nga pagpangluthang sang anay Liga ng mga Barangay president sa banwa sang Bingawan, Iloilo nga si anay punong barangay Noel Pendioday sang Barangay Agbao, Bingawan, Iloilo.

Sa interview sang Bombo Radyo kay Police Insp. Marvin Buenavista sang Bingawan Municipal Police Station, natabu ang insidente sa peryahan sa diin nagtabuay ang banas sang suspetsado kag sang biktima nga ginkilala kay Sidoro Prequencia y Quinlat Jr.

Gilayon nga ginluthang sang suspetsado ang biktima nga naigu sa iya wala nga kilid kag gindeklarar nga dead on arrival sa ospital.

Tatlo naman ang pilason matapos masalabat sang bala nga ginkilala kanday Esteban Castronuevo y Casabuena sang Barangay Agba-o, Bingawan nga nag-angkon sang pilas sa wala nga paa; Kellen Apustibar y Ortajo sang Barangay Ayuyan, Passi City nga nag-angkon sang pilas sa wala nga kamot kag Mark Amaguin sang Barangay San Isidro, Jaro, Iloilo City nga nag-angkon sang pilas sa tiil.

Na-recover naman sa crime scene ang .45 caliber pistol samtang atlarge naman ang anay punong barangay.

Ang asawa sang suspetsado amu subong ang nagapungko nga punong barangay sa lugar.